Roland Garros. Bugun Istomin – Federer bahsi. 8-to’qnashuvda kim g’olib bo’ladi? Tarixiy uchrashuv oldidan PREVYU

Kecha “Katta Dubulg’a” turkumiga kiruvchi mavsumning ikkinchi musobaqasi asosiy to’r bahslariga start beriladi. Mamlakatimizning birinchi raketkasi Denis Istomin saralash bahslaridan muvaffaqiyatli o’tib, ilk bor ushbu turnirning asosiy davrasiga yo’l olgandi. 

Bugun u asosiy to’rning birinchi davrasidayoq tennis afsonasi Rojer Federerga qarshi kortga chiqadi. SHu paytgacha Istomin va Federer o’zaro 7 bor to’qnash kelgan va ushbu bahslarning barchasida shveycariyalik tennischining qo’li baland kelgan. Ilk marta tennischilar 2006 yil Australian Open musobqasining birinchi bosqichida uchrashishgan bo’lsa, 2019 yil aynan shu musobaqada va yana ilk davrada ularning yo’llari hozirgacha so’nggi bor kesishgan. Bugungi bo’lib o’tadigan asosiy to’rdagi uchrashuv ikki tennischining faoliyatidagi o’zaro 8-o’yin bo’ladi.

Federer oxirgi 10 uchrashuvida nechta g’alabaga erishgan?

Rojer Federer o’tkazgan oxirgi 10 uchrashuvidan 6 tasida g’alaba qozongan. Joriy 2021 yilgi mavsumda Federer 3 bor kortga chiqdi. 2020 yil boshida Australian Open turnirdan so’ng Rojer jarohati tufayli faoliyatida katta tanaffus qildi. SHundan so’ng, 2021 yilda Doxadagi turnirda mavsumdagi ilk o’yinini o’tkazdi. Bugun “Rolan Garros” turnirida ilk uchrashuvini o’tkazadigan Rojer Federer turnirning 8-raketkasi bo’lib saralangan.

Istominning oxirgi 10 o’yindagi natijasi qanday?

Denis Istomin ham o’tkazgan oxirgi 10 uchrashuvidan 6 tasida g’alaba qozongan. SHulardan uchtasi aynan “Rolan Garros”ning saralash bahslariga to’g’ri keladi. Saralash bahslarida Istomin avvaliga Bosniya va Gercogovina vakili Damir Jumxurga qarshi kortga chiqib, raqibini 2/6,6/2, 6/1 hisoblarida mag’lub etdi. Ikkinchi bosqichda esa hindistonlik Ramkumar Ramanatxan bilan to’qnash keldi va 6/1, 6/2 hisoblaridagi g’alabani tantana qildi. Saralashning final bosqichida Istomin jahon reytingida 239-o’rinda borayotgan germaniyalik Tobias Kamkedan ikki setda 6/4, 7/6 hisoblarida ustun keldi va faoliyatida ilk bor “Rolan Garros”ning asosiy to’rida ishtirok etish huquqini qo’lga kiritdi. 

Malumot uchun, ayni paytda Denis jahon reytingida 203, Rojer esa 8-pog’onani egallab turibdi. Istominda tennis afsonasini ilk bor mag’lub etish imkoniyati mavjud. Federer esa ushbu turnirda chempionlikka davogar emasligini takidlab o’tdi. Demak, bugun qiziqarli bahs guvohiga aylanamiz degan umiddamiz. 

Denis Istomin – Rojer Federer uchrashuvi bugun Toshkent vaqti bilan soat 19:00da boshlanishi belgilab qo’yilgan. 

Olamsport.com sayti Denis Istominga omad tilaydi.

Xurshida Abdikulova tayyorladi