185
«PSJ» hujumchisi Mauro Ikardi qishki transfer oynasida «Yuventus»ga o‘tmadi, biroq unga A seriyaning boshqa klublari qiziqish bildirmoqda.
Calciomercato nashri xabariga ko‘ra, 29 yoshli argentinalik futbolchining xizmatlariga «Milan», «Napoli» va «Roma» qiziqish bildirmoqda. «Milan» hujum chizig‘ini yoshartirmoqchi, «Napoli» markaziy hujumchi pozisiyasida raqobatni kuchaytirmoqchi. «Roma» esa hujum chizig‘idagi futbolchilardan ko‘ngli to‘lmagan va ushbu kamchilikni argentinalik futbolchi orqali to‘ldirmoqchi.
Ikardi «PSJ»ga 2019 yilda «Inter»dan kelib qo‘shilgandi. Parijliklar avvaliga futbolchini bir yilga ijaraga olishdi, keyin esa 50 million yevro evaziga to‘liq transferni amalga oshirishdi.
Joriy mavsumda Ikardi Fransiya chempionatining 20 ta o‘yinida 4 ta gol muallifiga aylandi. Hujumchining shartnomasi 2024 yilda tugaydi va Transfermarkt Ikardini 28 million yevroga baholagan.
