Dillian Uaytga qarshi jangda WBC va The Ring kamarlarini himoya qilgan Tayson Fyurining faoliyatini yakunlagani haqida xabar bergan edik.

Jang yakunlanganidan so’ng Tayson Fyuri og’ir vaznda amaldagi UFC chempioni Frensis Ngannuni ringga chorladi. Avvalroq, bu ikki jangchining boks qoidalari asosida o’zaro ringda to’qnash kelishlari haqida xabarlar tarqagandi.  

“Barchasiga yakun yasashdan avval ringga Frensis Ngannuni chaqirmoqchiman. Men boksda og’ir vazn chempioniman, u esa bu vaznda UFC qiroli. Ngannu yaxshi sport formasida, qarang uning muskullarini. O’zaro jangimiz sportimiz tarixi uchun yangilik bo’ladi. Ikkimiz ham 120 kg vazndan og’irmiz. Bu esa jangning dahshatli bo’lishini taminlab beradi”, – dedi “Lo’lilar Qiroli”. 

Fyurining taklifi bilan ringga ko’tarilgan Frensis Ngannu ham britaniyalikka qarshi jang o’tkazish uchun tayyor ekanini malum qildi.

“Sayyoramizning eng xavfli ahmog’i kim ekanini aniqlab olamiz. Yana bir-ikki oydan so’ng jarohatimdan forig’ bo’laman. Bu gibridlar jangi bo’ladi”, – deya qo’shimcha qildi Ngannu.  

“Vahshiy”ning UFC bilan shartnomasi shu yil yakuniga etadi va u tashkilot oldidagi majburiyatlardan holi bo’ladi.  

“Jangimiz 2023 yilda bo’lib o’tadi”, – dedi Fyuri.